Երեկ Մարտունի քաղաքի և բնակիչների համար հոգևոր տոն էր. օծվեց քաղաքի Սուրբ Աստվածածին եկեղեցին:
Արտակ եպիսկոպոս Տիգրանյանի ձեռամբ կատարվեց եկեղեցու օծման հանդիսավոր արարողությունը, որին նախորդել էր դռնբացեքի արարողությունը` ձեռամբ Գեղարքունյաց Թեմի առաջնորդական տեղապահ Կիրակոս վարդապետ Դավթյանի: Արարողության ընթացքում ջրով և գինով լվացվել էին եկեղեցին և օծվելիք սպասքն ու պարագաները:
Հիմնանորոգված եկեղեցու վերաօծմանը ներկա էին Գեղարքունիքի մարզպետ Կարեն Բոթոյանը, Մարտունու տարածաշրջանի համայնքի ղեկավարները:
«Մաքրագործման օր է մարտունեցիների համար: Քաղաքն ունեցավ վերակառուցված եկեղեցի, որի անհրաժեշտությունը ամենքիս մեջ էր: Մենք երախտապարտ ենք յուրաքանչյուր նվիրյալ մարտունեցուն այսօրվա համար», ասաց Մարտունու քաղաքապետ Արմեն Ավետիսյանը։
Սուրբ Աստվածածին եկեղեցու վերականգնումն ու հիմնանորոգումը իրականացվել է դպրոցականների, ուխտավորների հանգանակությունների, Մարտունու քաղաքապետարանի, 100-ից ավել բարերարների, անհատ քաղաքացիների ջանքերով:
Ըստ նախագծի, եկեղեցին վերստին ստացել է իր երբեմնի ճարտարապետական տեսքը: Այն քաղաքի միակ եկեղեցին է, որը տևական ժամանակ, սկսած 1930-ական թվականներից, անմխիթար վիճակում է գտնվել: |